പാടാൻ മറന്നോരു പക്ഷീ
പാടവരമ്പിലെപ്പക്ഷീ
പഴമയൂട്ടും ചുണ്ടിലെന്തേ
പൊഴിയാത്തതിന്നു സംഗീതം
സ്മൃതിപഥം പിന്നിട്ടുപോകും
മനസ്സിന്റെ മൗനത്തുടിപ്പിൽ
ഇതൾനീർത്തിയുണരും തരംഗം
നിൻ പുരാവൃത്ത സന്ദേശം
ചെറുശ്ശേരി മുറ്റത്തു കാലം
നട്ടൊരപ്പൊന്മുളം തണ്ടിൽ
ദ്വാപരാരമ്യരാഗങ്ങൾ
കാളിന്ദിപോലൊഴുകുമ്പോൾ
കിള്ളിക്കുറിശ്ശിപ്പറമ്പിൽ
തേനൂറുമക്കാഞ്ഞിരത്തിൻ
താണൊരക്കൊമ്പിൽ നീ പാടും
ഈരടി കേട്ടുണരുമ്പോൾ
പണ്ടക്കലക്കത്തുനിന്നും
അമ്പലത്തട്ടിലാടീടും
അമ്പത്തിയൊന്നക്ഷരത്തിൻ
നീർമുത്തു പെയ്തിറങ്ങുമ്പോൾ
മാനസമെല്ലാം മറന്നൂ
രോമാഞ്ചഹർഷങ്ങൾ പൂണ്ടു
കൈരളിപ്പെണ്ണന്നൃതുവായ്
മുഗ്ദ്ധയായ് നീരാടി നിന്നൂ
കാകളിച്ചോലയിൽ താനേ
മഞ്ചരിപ്പൂമൊട്ടുണർന്നു
പൊൻ കളകാഞ്ചികുലുങ്ങി
അന്നനടമാർ കുണുങ്ങി
അച്ഛനാം സഹ്യന്റെയുള്ളിൽ
സ്നേഹക്കുറിഞ്ഞികൾ പൂത്തു
അമ്മതൻ പൂന്തിരക്കൈകൾ
താരാട്ടി മാറൂട്ടി നിന്നു
ചിന്തയിൽ വർണ്ണങ്ങൾ ചാർത്തി
നിൻ ഹാസരശ്മി ചോരുമ്പോൾ
കഥകൾ കാവ്യങ്ങളായ് പാറി
ഒരുനൂറുശലഭങ്ങൾ മണ്ണിൽ
ഇതു ഭൂമിതന്റെ സൗഭാഗ്യം
എന്റെയാജന്മ സൌഭാഗ്യം
അറിയുന്നു ഞാനായതീഞ്ഞാൻ
ആ സ്നേഹവാൽസല്യ ലോലം
വഴിപോക്കർ വാഴ്ത്തി സൗന്ദര്യം
വിലപേശി വന്നുനിൽക്കുമ്പോൾ
അതിനൊത്തരങ്ങാടുവാനായ്
മനയോല ചാർത്തുന്നു മക്കൾ
ശാരികേ, കരയായ്ക നിന്റെ
ശാലീന ശാരീരമന്റെ
ശ്രുതിയായി ലയമായ് മുഴങ്ങും
ശതകോടി വർഷങ്ങൾ വീണ്ടും
നിൻ വയലേലയിൽ വീണ്ടും
പൊന്നരിവാൾ രാകിയെത്തും
മണ്ണിൽ കുരുത്ത മൈഥിലിമാർ
കൊയ്ത്തുപാട്ടീണങ്ങൾ മൂളും
ശ്രാവണ സന്ധ്യകൾ കൂട്ടും
സിന്ദൂര വർണ്ണവും കാപ്പും
ഉത്തരമാരണിഞ്ഞാടും
ആതിരച്ചോടുവച്ചീടും
നടപഠിപ്പിക്കാൻ മരാളം
നൈഷധത്തിൽ നിന്നുമെത്തും
വാർമയൂരങ്ങൾ, മേഘങ്ങൾ
സന്ദേശമേന്തിപ്പറക്കും
ഗന്ധർവ ഗായകന്മാർ നിൻ
ഈരടിപാടിയെത്തുമ്പോൾ
കോടാനുകോടി ജന്മങ്ങൾ
ആ ഗീതമേറ്റുപാടീടും
പാടു നീയൊന്നിനിപ്പക്ഷീ
പാടവരമ്പിലെപ്പക്ഷീ
എന്നാത്മസംഗീതമായി
മലയാളമണമാർന്ന ഗാനം
മനസുകൾ തേടുന്ന ഗാനം
മാധുര്യമൂറുന്ന ഗാനം
പാടുനീയൊന്നിനിപ്പക്ഷീ
പാടാതെ പാടുന്ന പക്ഷീ
